O Consello Xeral da Arquitectura Técnica, comunícanos o inicio do trámite e información pública do proxecto de real decreto polo que se modifica o Código Técnico da Edificación, aprobado polo Real Decreto 314/2006, do 17 de marzo.

Esta modificación regulamentaria ten como principais obxectivos:

• A transposición parcial da Directiva (UE) 2024/1275 do Parlamento Europeo e do Consello, do 24 de abril de 2024, relativa á eficiencia enerxética dos edificios, incorporando a definición do indicador de Potencial de Quecemento Global (PCG) e a definición do edificio cero emisións.
• A revisión do Documento Básico de Seguridade en caso de Incendio (DBSI), que actualiza as esixencias relativas á propagación exterior do lume en fachadas e á seguridade en aparcamentos, en resposta ao incremento de vehículos eléctricos.
• A modificación do Documento Básico de Seguridade de Utilización e Accesibilidade (DBSUA), que introduce, entre outras medidas, aseos adaptados para persoas con ostomía.
• A adaptación do texto regulamentario ao novo Regulamento Europeo de Produtos de Construción, xunto cunha revisión xeral de todos os documentos para mellorar a súa coherencia e coordinación.

Podes acceder ao borrador do real decreto a través da páxina de Participación Pública do Ministerio de Vivenda e Axenda Urbana, na seguinte ligazón: Proxecto de real decreto polo que se modifica o Código Técnico da Edificación, aprobado por Real Decreto 314/2006, do 17 de marzo | Ministerio de Vivenda e Axenda Urbana.

As achegas podes trasladalas a través do mail: gestiongabinete@coatac.es antes das 14:00 horas do 28 de novembro de 2025.